h e l l o ! 

 

成世人流流長，總會收過幾份伏到事隔多年都忘記唔到嘅聖誕禮物～啤啤綜合咗過往咁多年嘅送禮同收禮經驗，總結咗以下呢4個禮物中伏位，揀禮物嘅時候自己識執生啦 (或者你想惡搞朋友嘅話…) 

 

食物本身可伏可唔伏，起碼就算再唔啱心水，食晒佢哋就解決咗，總好過收到完全唔等駛嘅嘢，擺喺度都唔知點算好。不過食用日期先係關鍵！跌咗個良心嘅朋友分分鐘會送出已經過期嘅食物，仲有少少惻隱之心嘅可能都仲會送出年底先到期嘅食物，留返幾日畀你同時間競賽。

 

聖誕節意味住一年仲有幾日就完結喇，如果呢個時候抽禮物抽到當年嘅月曆、生肖運程書或六合彩飛等等，同收到一份垃圾無誤，不過起碼得啖笑之後可以狠心掉咗佢。

 

延伸閱讀｜【聖誕禮物懶人包】$100、$200、$300、$400、$500預算聖誕禮物推介

 

揀禮物唔一定愈大份就愈有著數，朋友惡搞起上嚟，可能會買啲極大/極佔地方嘅禮物，見過有人收到疊到聖誕樹咁嘅卷裝廁紙、一大張被、小心地滑指示牌，甚至一盆花，托餐死拎到返屋企，仲要搵地方安置佢，真係隔住個Mon都覺得攰啊。

 

圍威喂交換禮物嚟講，包得好靚/ 用名牌紙袋包住嘅禮物通常都會伴隨住直升機降落嘅聲音：「伏伏伏伏伏伏伏伏～」。華麗嘅包裝多數只係掩飾， iPhone盒裝住嘅可能係磚頭；表面係紅酒盒，其實裝嘅係鮑魚刷；打開名牌香水盒見到嘅會係…藥油？當你以為執到寶，懷住乍驚乍喜嘅心情拆開禮物先知自己中咗大伏，心情真係隨即由天堂跌到落地獄～

 

咁伏嘅禮物雖然會製造好多難忘嘅回憶，但同時都係對友情嘅一大考驗，唔想畀朋友追擊到2046嘅話，揀返份有心思嘅聖誕禮物畀佢氹返佢開心啦！