h e l l o ! 

 

一講起日本，好多人都會聯想到拉麵！根據新横濱拉麵博物館同Japan Times合作嘅問卷調査發現，最受外國旅客喜愛嘅日本美食第1名正正就係拉麵喇！依家暫時無得去日本，喺香港去連鎖拉麵店或者隱世拉麵小店，回味一下日本嘅味道都可以一解鄉愁！

 

日本國民美食

拉麵唔單止係遊客去日本嘅必食之選，更加係日本人嘅comfort food，同咖哩一齊並列為「日本兩大國民美食」，好多日本人平均每個禮拜都會至少食1次拉麵！而日本全國大概有8萬間提供拉麵嘅舖頭，一年總共賣出12億至14億碗拉麵啊！由於熱愛拉麵嘅日本人想隨時隨地都可以食到拉麵，所以日清創辦人安藤百福就參考咗天婦羅嘅製作方法，利用油炸嘅乾燥技術保存麵條，研發出即食拉麵同杯麵拉麵！

 

日本唔同地區都有各自盛產嘅農作物同海產，日本人會活用各地嘅特色食材，演變成各種口味獨特嘅在地拉麵。當中最為香港人熟悉同喜愛嘅分別係以下呢4個拉麵派別：

 

 

1.    東京醬油拉麵

東京拉麵主要係指傳統嘅醬油風味。湯底由豬肉、雞骨、柴魚高湯同醬油熬製而成。常見嘅配料有叉燒、筍乾同鳴門卷。清澈嘅湯頭加上中細捲麵，屬於清爽型嘅拉麵。

 

2.    札幌味噌拉麵

使用味道香濃嘅豬油同雞骨湯作湯頭，加入日本傳統味噌醬調味。最大特色係好多時都會放入一塊牛油同預先用味噌炒過嘅配料，令味道更濃郁同有層次！

 

3.    博多豚骨拉麵

豚骨拉麵最早發源於九州，特色係以大火高溫長時間熬燉至乳白色嘅豚骨濃湯。因為採用極幼麵嘅關係，麵條更加容易掛湯，為咗避免麵條浸得太耐會淋哂，麵量會特別少，從而衍生出「替玉」（かえだま），俾客人追加麵條。

 

4.    函館鹽味拉麵

相傳鹽味拉麵湯頭嘅做法係由橫濱中華街嘅中國居民傳入北海道函館，用細火慢慢熬煮雞骨或豬骨，再以粗鹽同岩鹽作調味。雖然湯底睇起嚟比較清淡，但食落反而更凸顯到高湯本身嘅鮮味。因為味道清爽同容易入口，所以備受大眾歡迎！

 

 

日本拉麵店必學單字

如果想喺日本食到客製化嘅拉麵，咁就要知道點餐時會用到嘅單字啦！啤啤精選咗幾個常用嘅拉麵用語，下次去日本嘅拉麵店就可以用到啦～

 

🍜 かため / やわめ：硬 / 軟

平時大家食拉麵，對麵條嘅軟硬度有無特別要求呢？鐘意食彈牙啲或者淋身啲嘅話，記住落單嘅時候同店員講啦！

 

🥚玉子（たまご）：雞蛋

玉子都可以分好多種口味㗎！有半熟玉子（ ゆでたまご）- 溏心蛋、味付玉子（にたまご）- 滷水蛋同溫泉玉子（はんじゅく）- 溫泉蛋等等。

 

🥢替え玉（かえだま）：加麵

見到「玉」字千祈唔好以為係講緊雞蛋啊！其實係指另外加多一份麵條嘅意思，九州風味嘅拉麵店會比較常見～

 

🌶辛子高菜（からしたかな）：辣高菜

博多拉麵店一定會見到嘅拉麵配料！將芥菜同辣椒等調味料做成漬物，味道鹹鹹辣辣，係拉麵嘅最佳拍擋！

 

日本除咗拉麵，仲有好多好正嘅麵食㗎，即刻入撳入嚟睇吓啦👉🏻  https://bit.ly/35GsiaQ